اسرار وصفة عجينة حلو كعك النقاش

الدرس 58 : كعك النقاش

السلام عليكم ورحمة الله تعالى وبركاته للأحباب كامل، مساء الخير للجميع ، ديما مع #دروس تعليم الطبخ والحلويات بإحترافية.. استاذة الحلويات لبنى مختاري

الدروس ان شاء الله رايحة تكون متسلسلة ،نعطيكم اسرار نجاح الوصفة و ترتيب الدروس رايح يكون وفقا للبرنامج المعتمد عندي في الورشة، تأكدو تماما ماكانش أستاذة تعطيلك الوصفة والدرس بالتفصيل الممل وتشرح وتعاود غير حبيبتكم شاف لبنى، يعني باينين دروسي، وباين أسلوبي، وباينة شخصيتي من منشوراتي خليهم يندبو بيهم ويخطوني برك، كيما قلت ونعاود باب خير لكل إنسان وإنسانية من القلب، المقابل هو دعوة خير وفقط.....

كعك النقاش واسرار النجاح

#العجينة

نديرو نص كاس سكر ناعم +5 مغارف ماء زهر نخلطوهم مليح نحطوهم جانبا

3كيلات فرينة مغربلة +كيلة سمن ذايب و بارد ولازم يكون بارد باش ما تتكلحيش في الماء زيديلها ربع كيلة مرغرين او زبدة للذوق وعطريها بقليل من الفانيلا و مبشور الليمون هكذا تتحصلي على كعك نقاش بذوق رائع ،اخدميهم مليح بيدك زيديلهم رشة ملح و اعجنيهم بخليط ماء زهر و السكر الي درناه ،كي تكملي الخليط زيدي الماء حسب العجين...

#كيفاش تعرفي العجينة بلي خلاص ما تزيديلهاش الماء؟ لازم كي تحربشيها في يديك و تقوسيها ما تتشققلكش .خبيها في ورق الشفاف و خليها تريح مدة ساعة لكن الافضل تريح ليلة كاملة يجيك روعة و العجينة تعطيك الطوع في الخدمة (دايما العجين تاع 3فرينة ب 1سمن الافضل يبات )..

#الحشو :غرس نقيوه و فوروه زيدولو القرنفل مرحي+ قرفة+ زوج مغارف سمن ذايب+شوي ماء زهر لازم الغرس يكون طري بزاف بلا ما يتلاصق في اليد باش ما يجيكمش يابس كي يطيب.ولاحقا رايحة نحطلكم درس خاص بطريقة تحضير الغرس وكيفية الاحتفاظ به.

#تحبي تحشيه كاوكاو تصلح عادي.. ونفس الحشوة تع تشاراك والكعيكعات والعرايش...

#نبداو التشكيل :

التشكيل قسمو العجين لكويرات تاع 30 غ من الافضل اوزنوهم باش يجيوكم على يد وحدة اذا ما عندكش الميزان استعملي نظرية عينك ميزانك ،،حربشو الغرس وما تخشنوهمش لازم صبيعات رقاق باش ما يجيش يقهم..

و من جهة اخرى كي تجيو تنقشوه ما يخرجش..

نحلو الكرية تاع العجين بشكل مستطيل ديرو الغرس في الطرف و روليو 3 دورات ،كي تلحقو للحافة عبزو عليها بيديكم من بعد كملو روليو و ملسوها مليح باصباعكم و اغلقو النقاش جهة سكروها بشكل راس القلم و جهة افتحوها بصبعكم الصغير ودخلو الطرفين في بعضاهم..

من صور تفهمو احسن

#طريقة اختيار النقاش:

كي تروحي تشري طابع النقاش اغلقيه وتاكدي بلي الاسنان متطابقة ،تاكدي بلي ما فيهاش اعوجاج في الاسنان ،الاسنان تاعو ما لازمش تكون حادة لاحظو الفرق في الصورة ،لازم يكون الطابع املس كي تمسوه بصباعكم ما يجرحش.

#طريقة النقش :بزاف سالوني على طريقة النقش ،لازم كي تحطو الطابع في العجين انقشو مسافات صغيرة ما تكبروهمش باش يجيكم النقش مليح ،عمركم تفتحو الطابع في العجين رايح يتقطعلكمو يعطيكم شكل ماشي مليح ،،افتحوه شوية فقط و ارفعوه لاعلى كيما راهو موضح في الصور ،... ونبدا النقش من برا ثم ندخل للداخل..

#العجين :اكثر مشكل تصادفوه مع العجين المكون من الفرينة و ليدام و ماء زهر هو الحبيبات و تشوفو فيها الوان مختلفة تاع العجين ،هنا عمركم ما تخدم بيها هكذاك هاذي الحبيبات تجي من ليدام يجمد لداخل على بيها تصادفو هذا المشكل كتر في فصل الشتاء لذا لازم عليكم تخدمو العجينة وتكون ملساء..

مثلا عجينة الي تشكلوها كويرات مثل النقاش و العرايش و التشاراك احكمو الكرية بيديكم حركوها مليح في راحة اليد حتى تولي ملساء لانو اليد سخونة تعاون ليدام يذوب

الافضل تحطو الحبة فوق طبسي صغير او كوب بات وتبداو النقش من الفوق اولا،الي مبتدئة في النقش تدير اربع نقوش متقابلين من بعد بين كل نقشين تعمل نققش يعني يرجعو 8 من بعد تكمل تنقش بالتوازي ثم تنقشوا من الاسفل يجيوك حبات متوازنين الله الله وقد قد...

#نطيبو النقاش في 180 درجة حتى يدي يحمار مليح يولي باهي كيما نتوما طبعا ..

#وتبقى لكي حرية الاختيار تحبي تقدميه هك تحبي تعسليه، او ترشي سكر رطب..

#بالنسبة للكعك النقاش المعسل بوصفة جديدة، شفتوه عندي من قبل في المنشورات،. هنا كنت استغنيت تماما علا السكر في العجينة، ولكنني أضفت ليها جلجلان محمص ومرحي ناعم، وخدمت بنفس الطريقة، ولكن جبت أيضا القطايف بعد ما شربتها بلى دام ديما نقلكم خلطو سمن وزبدة ذايبين وباردين، حطيتها في المنتصف كيما العش، وطيبتو، بصراحة طعم رائع، ولما طاب عسلتهم شوية ونحيتهم يقطرو بنفس طريقة الدزيريات.. والتزيين حطيت حبات بندق، ولكم الاختيار..